يلا هتبدأ بنفسك .. وتدخل على موقع تويتر www.twitter.com وهتنشأ حساب جديد لنفسك وبعد كده هتلاقي صفحة تعتتبر خالية إلي حد ما وفيها شوية صور وأصدقاء قد تكون تعرف حد فيهم بس الأكيد إنك مش هتلاقي حد تعرفه ..
طيب خليني أوضح الأول إيه فكرة الموقع .. بما إنك عملت حساب يبقى ناقص إنك تضيف حسابات أصدقاء أو بمعنى أصح الناس اللي هتابعهم على تويتر ،، وزي ما احنا في الفيس بوك بندور على الصديق أو الصفحة بالإسم ..
هتلاقي عندك برده مربع Search هتبدأ تكتب الإسم اللي انت المفروض عارف إنه خاص بواحد صديقك ،، أو بموقع معين ،، أو بقناة تلفزيونية معينة ..
يعني مثلا لو عايز تدور على الجزيرة أو قناة العربية هتكتب في البحث (الجزيرة) وهتلاقي نتائج بحث كتير وكل ما عليك فعله إنك تبدأ تضغط على كلمة Follow اللي موجودة بجانب الشخص أو الحساب اللي انت عايزه ..
وأول ما تتابع أي حساب هتلاقيه مباشرة في العمود على يمين الصفحة تحت إسم Following يعني الأشخاص اللي انت بتتابعهم .. وطبعا مش هتنسى تتابع الحساب بتاعي a_elshiekh .
خلاص كده إنت فعلا بدأت تتابع الناس وهتلاقي أخبارهم هتظهر في الصفحة عندك ،، وعشان تبدأ تشوف أخبار الناس عندك اضغط على Home أو على كلمة Twitter في أعلى الصفحة وكده هيجيبلك الصفحة بتاعتك وفيها الناس اللي انت بتتابعهم.
طيب ده بالنسبة للي أنا بتابعه .. طب ازاي الناس هتابعني ؟؟ هقولك إزاي .. إنت لما تفتح الصفحة الرئيسية بتاعتك هتلاقي سؤال بيقول What happening ? وده بالضبط عامل زي Status  في الفيس بوك .. يعني اللي هتكتبه في المربع ده هيوصل لكل الناس اللي بتتابعك بس على شرط إنه يكون 140 حرف فقط .. ومن هنا فكرة الموقع إنك تغرد أو تعمل تويت بحروف بسيطة تعبر عنك ..

يلا عايز أشوف كام واحد هيعمل حساب وكام واحد هيتابعني وأهلا بيكم في تويتر

تويت تويت تويت … 


جاءت كلمة تويتر من تويت بمعنى تغريد لأنك من خلال الموقع بتوصف حالتك أو تعليقك من خلال 140 حرف بس .. والحالة دي هتوصل لكل اللي بيتابعوك على تويتر بحساباتهم الخاصة على تويتر ..


وزي ما اتفقنا انت عملت حساب وبدأت تدور على ناس عشان تضيفهم في صفحتك ..
طيب أنا مش عارف أضيف حد عندي في توتير لأني معرفش حسابات عشان أتابعها ،، خلاص الموضوع بسيط هتدخل على أي موقع تلاقي فيه كلمة تابعنا على تويتر .. ومن خلال ضغط على اللينك ده هيبدأ يفتح صفحتك على تويتر ويضيف الموقع ده عندك .. يبقى إنت بكل سهولة أي موقع يعجبك ضيفه عندك في تويتر بشرط إن الموقع يكون عنده الميزة دي .. 


يلا حاول تاني ومش هتطلع من الموقع إلا لما تقتنع بيه وتتابع وهتحس ساعتها بميزة الموقع وممكن تشوف أنا بتابع مين وتبدأ تتابعهم انت كمان عندك .. 
فكرة تويتر قريبة جداً من فيس بوك بس بشكل مختلف وعملي أكثر ..

صورة من الحساب بتاعي للتوضيح
وكمان شرح فيديو