وطبعا فيه أنواع متصفحات كتير لكن أشهرها ..

Internet Explorer ( IE) – Google chrome – Firefox – Safari – Opera – Maxthon – RockMelt .. وغيرهم طبعا كتير

وعشان نركز أكتر هنتكلم على أشهر متصفحات وهي :-

Google Chrome

Firefox

Opera

Safari

Internet Explorer

معلش هطول عليكوا النهاردة شوية بس لازم نعرف الفروقات بالضبط لأننا كلنا هنستفيد من اختيار المتصفح المناسب وهيوفر وقت كتير بعد كده ..

إحنا عايزين نتعرف على الفروقات بينهم وأختار أي متصفح وليه ؟؟

1-   أول ميزة وأهم ميزة ولازم الكل يبدأ يستخدمها .. هي ميزة المزامنة Sync ..

 طبعاً كلنا بنحتاج نحفظ مواقع مفضلة ونحفظ الباسوورد للمواقع اللي بندخل عليها بكثرة ونحفظ إعدادات المتصفح وغيره وغيره .. ولأنك بتشتغل على أكثر من جهاز فإنت مضطر تنقل المفضلة معاك لكل جهاز .. ولكن الخاصية دي هتقدر من خلال تسجل دخول في المتصفح نفسه وبالتالي هيكون ليك حساب على المتصفح وهو هيبدأ يحفظ جميع إعداداتك والمفضلة وكلمات السر ويحفظ ده كله في حسابك ..

 بحيث إنك لما تدخل من جهاز آخر كل اللي هتعمله هتسجل دخول بحسابك على المتصفح الجديد وهتلاقي كل حاجة تم إضافتها للمتصفح وكأنك قاعد على متصفحك الأساسي في البيت مثلا .. والميزة دي موجودة في جوجل كروم وفي الفايرفوكس ومش موجودة في الإكسبلولر ..

2- فرق كمان هتلاحظه بين المتصفحات دي هو عامل السرعة ..

والمقصود هنا السرعة في فتح صفحات الويب وتحميل الصور والفيديو .. وكمان السرعة دي ممكن تلاحظها أكتر لو فتحت صفحة ويب ودخلت جوة صفحة تانية وتالتة وبعدين حبيت ترجع للصفحة السابقة هتلاقي بعض المتصفحات بتخزن الصفحات دي وبالتالي هتكون أسرع في الرجوع للصفحة المطلوبة وبعضها بيفتح الصفحة تاني من على الإنترنت وبالتالي هياخد وقت أطول.. ده غير إن في مميزات لمتصفح عن التاني في فهم الكود وتحليله بسرعة وبالتالي فتح الصفحة بشكل أسرع.

3 – فرق تاني بين المتصفحات دي وهو ده الأهم .. خاصية إسمها خاصية Extensions  ..

وهي عبارة عن إمتدادات أو برامج يتم إضافتها للمتصفح وتستمع بمميزات جديدة في المتصفح.. ومن الإضافت دي ( الطقس – المؤذن – المترجم – إغلاق نوافذ الإعلانات المزعجة .. إلخ ) ،، والإمتدادات دي موجودة في الفايرفوكس وفي جوجل كروم وفي سفاري ، ومش موجودة في انترنت اكسبلولر .

ودي صورة من الإمتدادات اللي أنا بستعملها >>

4-   خاصية كمان إسمها InPrivate ..

ودي ميزة موجودة في انترنت اكسبلولر والفايرفوكس وسفاري ومعناها إنك هتتصفح المواقع بخصوصية تامة يعني مفيش تسجيل أي معلومات ليك على الجهاز أو أي معلومات في الكاش ،، وطبعا ده يفيدك لو إنت بتدخل من جهاز في مكان عام ..

5- آخر فرق هقوله هو خاصية الــ Tabs ..

وهو إمكانية فتح أكتر من صفحة في نفس البرنامج ولكن الميزة هنا أن كل تاب يمثل عملية منفصلة وبالتالي يمكنك سحبه منفصل خارج البرنامج دون إعادة تحميل الصفحة وأيضاً يمكنك ترتيبها وجمعها حسب المواقع .

حاجة أخيرة المواقع كلها بتشترك فيها وهي الإضافات ويطلق عليها Add-ons  أو Plug-ins .. ودي مثلا زي اضافة الفلاش بلاير عشان تقدر تشغل ملفات الفيديو وملفات الفلاش المختلفة .. فيه كمان إضافات عشان تقدر تشغل بعض الألعاب على المتصفح .. وغيرها وغيرها ..

الخـــــــلاصــــة :-

مقارنة بسيطة بين المتصفحات تقدر من خلالها تختار وأنا هنا هذكر المميزات فقط ومش عايزين نذكر عيوب لأن كل واحد ليه وجهة نظره .. وهبدأ بالأفضل ..

Google Ghrome:-

سريع جداً — إضافات مميزة Extensions — خدمة المزامنة Sync للمفضلة وكلمات السر وغير ذلك — ارتباطه بالعديد من خدمات جوجل — في حالة حدوث مشكلة أثناء التصفح وإغلاقه يستعيد التشغيل ويبدأ من حيث كنت — سهولة التعامل مع الـ Tabs وإمكانية تحريكها وفصلها — تطويره بشكل مستمر

Firefox:-

سريع في التصفح —  به عدد كبير من الإمتدادات Extensions — خدمة المزامنة Sync للمفضلة وكلمات السر وغير ذلك — تطويره بشكل مستمر — خاصية التصفح الآمن  Private — يفضله الكثير من مصممي ومطوري المواقع — في حالة حدوث مشكلة أثناء التصفح وإغلاقه يستعيد التشغيل ويبدأ من حيث كنت.

Opera:-

سريع جداً في التصفح —  به عدد كبير من الإمتدادات Extensions — خدمة المزامنة Sync للمفضلة وكلمات السر وغير ذلك — – خاصية التصفح الآمن  Private — خاصية Speed Dail وهي خاصية تتيح لك الوصول للمواقع الشائعة الإستخدام بسهولة عن طريق الضغط على رقم الصفحة التي تظهر عند فتح نافذة جديدة .

Internet Explorer:-

متوافق بنسبة أكبر مع جميع المواقع — خاصية التصفح الآمن  InPrivate — التحكم في الإضافات الموجودة في المتصفح لتحسين سرعة وأداء المتصفح — سهولة التعامل مع الـ Tabs وإمكانية تحريكها وفصلها.

Safari:-

تصميم ممتاز ومظهر رائع — سريع في التصفح —  به عدد كبير من الإمتدادات Extensions — خاصية التصفح الآمن  Private.

أنا حاولت أختصر على قد ما قدرت .. وسامحوني للإطالة .. وأنا عارف إني مقلتش كل حاجة .. وفي إنتظار تعليقاتكم …