شركة ِApple  ببساطة هي المنافس الأقوى والأكبر لشركة مايكروسوفت .. والرمز الخاص بها اللي هو التفاحة أتى من كلمة McIntosh  وهو أحد أنواع التفاح ..

وشركة أبل لها أجهزتها الخاصة بها ونظام التشغيل الخاص بها والجهاز بيتم تصنيعه في شركة وحيدة وهي آبل وبيتم تنزيل نظام التشغيل عليه بمعرفة الشركة وبالتالي صعب تلاقي عدم توافق بين الجهاز ونظام التشغيل مما يؤدي لأداء قوي جداً وحماية وأمان وصعب كمان إنك تلاقي الجهاز يهنج أو تجيلك شاشة زرقاء أو أي مشاكل من اللي بتحصل مع أجهزة IBM ..

 وفي الوقت اللي كانت شركة مايكروسوفت فيه بتبدأ بنظام الدوس اللي مكانش فيه ماوس ولا ايقونات ولا واجهة رسومية كما هو الحال الآن .. كان وقتها نظام أبل ماكنتوش هو الوحيد الذي يوجد له واجهة رسومية ومعالج رسوميات خاص مما أتاح قدرة أكبر في التعامل مع الجرافيك ومع التصاميم ،،

وعشان كده الناس كلها كان عندها اعتقاد إن أبل ماكنتوش جهاز يستخدم في المطابع وفي الطباعة والصور والتصاميم وبرامج الجرافيك والنشر نظراً لقوته في هذا المجال ..

 ولكن مع الوقت بدأت آبل تستخدم معالجات تسمح لها بتشغيل نظام IBM وتقدر تنزل نظام مايكروسوفت على أجهزة آبل إنما العكس لأ متقدرش تنزل آبل على أجهزة IBM.. بس طبعا أنصحك تحافظ على نظام التشغيل اللي موجود على جهازك الماك ومتحاولش تغيره .. وفيه أنواع كتير أو إصدارات من نظام التشغيل ده ..

بس بشكل عام نظام التشغيل الخاص بأجهزة آبل ماكنتوش بيطلق عليه MAC OS ووصل دلوقتي
لـ MAC Os X  .. أو Max Os10..

 أما بالنسبة لأنظمة التشغيل الخاصة بأجهزة آبل الأخرى فهو نظام بيطلق عليه IOS وزي ما اتفقنا ده نظام خاص بشركة آبل وفيه منه إصدارات وآخر إصدار دلوقتي هو IOS5 ..

وخلينا ناخد فكرة بسيطة عن منتجات شركة آبل ببساطة :-

Mac pro: وهو جهاز مكتبي وبيختلف طبعا الموديل حسب مواصفاته ..

iMac: وهو جهاز كامل من خلال شاشة وكيبورد وماوس فقط وطبعا فيه كل مميزات الجهاز المكتبي ..

 

Mac air pro : وهو يعتبر أنحف وأخف لاب توب ويعتبر أغلى لاب توب مقارنة بمواصفاته ..

iPod: وهو جهاز مخصص لتشغيل الميديا أو ملفات الوسائط وممكن تعرض فيه صور وكما بعض الألعاب .. ومنه إصدارات كتير iPod classic – IPod shuffle – iPod Nano – iPod touch

 

iPhone: وهو هاتف ذكي من آبل ويحتل جزء كبير من سوق الهواتف المحمولة وإمكانياته وقدراته هائلة وآخر إصدار كان iPhone 4

 

Ipad1: وهو جهاز لوحي أو جهاز كفي ويحمل مزايا الهاتف المحمول ومزايا الكمبيوتر ومزايا المساعد الرقمي في نفس الوقت ونزل منه إصدارين iPad – iPad2 وبصراحة الإثنين أحسن من بعض ..

 

وفي الآخر مش هقدر أنسى أذكر المدير التنفيذي للشركة وهو ستيف جوبز واللي كان صاحب الفضل في التطور الكبير اللي أصبحت في آبل دلوقتي .. وأتمنى إنه يتماثل للشفاء ويستمر في عطاءه للشركة ..

طبعاً دي فكرة بسيطة عن شركة Apple .. أتمنى يكون الشرح عجبكم وللحديث بقية ..

Advertisements